“It's Kind of a Funny Story” (2010)
10.5.2022 – #Movies
Directed by Anna Boden & Ryan Fleck
Written by Anna Boden & Ryan Fleck (screenplay), Ned Vizzini (novel)
電影改編自同名小說，內容取材自作者的個人經歷。主角是高中生Craig，因抑鬱和有自殺念頭而主動求醫，機緣巧合之下被安排住進成人精神科病房，展開五天彷若宿舍般的團體生活。
像是一個從朋友聽來的故事，輕鬆而親切。除了funny，也是fantasy，結局很美好，乜人生會咁順利咩？不過我鍾意。睇到最後心情真係幾歡快，有股蠢蠢欲動嘅力量去continue my life.
雖然話Craig抑鬱，但故事唔deep亦唔dark. 每個人都有佢自己嘅難關要過，而每個人都可以搵到佢嘅解決方法。最重要係佢願意，兼夾身邊有人支持。
“If you're not busy being born, you're busy dying.” —Bob Dylan
戲裡面有個位描繪得幾好：當個精神科醫生問Craig有咩問題、叫佢解釋吓時，Craig內心浮起各種情境（顯示佢嘅壓力來源），然而佢自己都清楚，呢啲問題如果講咗出嚟就唔再係問題，因為喺事實層面而言的確係好少事，旁人可能以為佢只係多愁善感。所以佢嘅回答係：「好難解釋。」
平時同人傾偈，可能都曾經試過否定或者輕視他人嘅問題，久而久之人哋就唔會再想多講，寧願收埋。設身處地去諗，一旦講咗出嚟，別人不當是一回事，僅輕描淡寫安慰幾句作敷衍，或者建議「唔好諗咁多」，羞恥之情就湧現，比唔講更難受。
唔知係咪因為咁，Craig唔將問題講出口，但佢從不會否定自己嘅struggle同感受，而且好清楚知道自己唔掂、需要幫助。
但世界上唔係人人都好似Craig咁識得主動求助，又有咁supportive嘅家人，咁啱遇到樂於助人嘅幽默肥仔Bobby同埋純情靚女Noelle，可以喺五日之間得到力量去作出改變。
而原著小說作者Ned Vizzini，喺小說出版七年後跳樓自殺，時齡三十二。